وزي ما انتو عارفين الخواجات بحبو الخير رغم انهم هم البفتوننا ويدعمونا بالسلاح عشان نقتل بعض ويجوا بعدين يحاكمونا في لاهاي ..
لكن..
برضو طيبين وبحبو الخير وعشان تتأكد انهم طيبين وبحبو الخير احضر افلام MBC2 وشوف كيف الخواجة يموت عشان خاطر كديسه…
الخواجات..
بحبو الخير ماهو انا قلت ليك زمان وكلمتك أنو الخواجات ديل ببيعوا لينا البنبان عشان نضرب بيهو المتظاهرين نقووووم نضرب المتظاهرين بالبنبان الاشتريناهو من الخواجات يطلعوا الخواجات زاتهم الباعوا لينا البنبان عشان نضرب بيهو المتظاهرين ينددوا بالعنف المفرط ويشتمونا في قناة الجزيرة …
الخواجات الطيبين البحبو الخير عندهم قانون تظاهر في بلدهم لكن ممنوع علينا نحن المستعبدين نعمل قانون زيهم وعادي السفارة البريطانيه في السودان تدعم العيال الشفاته بالدولار عشان يحرقوا لساتك ويترسوا الشارع لكن لو سوداني اشتري من حر مالو لستك وحرقو في لندن وقال مدنياااااو لمن الحاجة إليزابيث نطت ينجلد لمان يبان ليهو صاحب…
عادي….
عادي الناس دي بتحب الخير زي حب قطر للديمقراطية العملت بسبب الحب دا قناة اسمها الجزيرة لدفاع عن الديمقراطية والحريات في الوطن العربي..
حا تقول لي قطر زاتها مافيها حريات وديمقراطية..؟!
اقول ليك… انسييييييييييييي قبل ما يخش واحد مستعبد ومستفيد من العقال يشتمك لصالح طال عمرو ولا يراعي فيك حتى حق الجيره …
المحيرني عاملين عيد استقلال…
يعني هسي عايز تقنعني اننا أحرار وبريطانيا طلعت من السودان عشان دبكه قال ليهم اطلعوا وطوالي قاموا طلعوا..؟!
انت جادي…؟؟
لسه.. لسه.. لسه.. لسه.. والله عيد الاستقلال لم يحن وقته بعد ولم احتفل به يوم في حياتي لاني لسه ما اتحررت من عبودية الرجل الأبيض وكونوا تتحرر حيط القصر الجمهوري ومباني البرلمان وانا لسه عبد دا عندي ما استقلال بل استغلال ..
كل الحصل خواجة مشي من الحر عشان يحكمنا من بهناك وهو تحت المكيف.
المهممممممممممم…
مبادرة فولكر طلعت لا مبادرة ولا حاجة لكن تعليمات ..
مبادرة فولكر حاجة كدا زي الشفع يكونوا جايطين في البيت عااااك وااااك غااااغ عااااك ابوهم يصرخ فيهم هسسسسس
خلاص كفاية..
في شنو..؟؟
اقعدوا ساكتين..
تعالوا وروني بتشاكلوا مالكم…؟؟
فولكر قال لا عندي مبادرة ولا حاجة كل مافي الأمر قال للهيصة هسسسس..
وبرهان يرجع لحمدوك شنطتو وانت يا الشيخ امش جيب اللبن ومرررريم غسلي العدة المكومة دي…
خالد سلك ممتحن تامنه مافي زول بسألوا…
المهمممممممممممممم
كل الذين يعانون من جينات الاستعباد جوووو زحفاََ زحفا وبعض يمشي مششا مششاََ رجال نساء كبار سن حوامل مساطيل متسلقين سماسرة لايفيين وتسابين وحتى المتفسبكين …
كلهم جوو لاعلان الولاء لمبادرة الحاكم بأمره فولكر..
يقوووووم يا مؤمن يطلع فولكر زاتو ما عندو مبادرة من اصلوا كل مافي الأمر
هسسسسسس
ياخ دا شعب يحب المكابسه بطريقة عجيبة..
انا شخصياََ لو حكمت البلد دي يوووووم واحد بس أول حاجة بعملها بلم سياسين علي خبراء استراتجيين على مثلييين على نسووين على راستات على سانات ولايفيين وابيعهم بالكيلو واشتري بحقهم زيرين أعملهم سبيل..
معقوله يااااخ برنامج ساعتين ناس تتغالط ويقولو لينا دي سياسة؟؟
قال برنامج هادف قال….
تبا لكم والسياسة….
( منصور الهادي)
