رفع حالة الطوارئ .. هل فهم البرهان اللعبة ؟
المتتبع لقرار رئيس مجلس السيادة الاخير برفع حالة الطوارئ التى فرضها قبل سبعة شهور و الحملات الامنية المكثفة التى إنطلقت لاجتثاث بؤر الجريمة والانفلات الامني وحالة التعافي التي بدأت تدبُ فى أوصال الخدمة المدنية والحراك المتعاظم للوزراء المكلفين والولاة كل هذه الايجابيات وغيرها تقول أن الوطن قد تعافي وإغتسل من رجس اليسار والعالمانيين .
ومن يلتفت لسني قحت أو السنة الاولي والثانية تحديدأ يلاحظ أن من تصدي وناجز اليسار هى القاعدة الشعبية العفوية التلقائية الاسلامية الوطنية .(قول لى كيف) ؟
تتذكروا القراي ونصر الدين مريسة ومش عارف مفرح ! تتذكروا المجاهرون بالمعصية المتشيدقون بالانتقام الاعمي من من كل ماهو إسلامي فمن تصدي لهم ؟
اليست هى فئات الشعب المسلم التى ساءها تآكل عملتها ودينها وقيمها و بعد ما سرعان ما اكتشف زيف وكذب اليساريون ومن شايعهم !
تتذكروا أكرم (كرونا) ومدني (جرادل) وابراهيم (السيخ) ومش عارف الدقير بتاع (المجد للساتك) والقائل الحصري لعبارة (حُمي النفاس الثوري) . تتذكروا وزير الطاقة عادل الرجل الصريح القائل (حالنا مسجم ومرمد) . تتذكروا (سواقين الخلا) ناس الاصم (بالمناسبة انتو الزول ده زاغ وين ؟) تتذكروا خالد سلك والخطيب والشفيع وشلة المزرعة وناس فيصل محمد صالح الناصري الذى كان يتقيأ حقدأ خلف كل (مايكرفون) . تتذكروا ناس (نفرتكا طوبة طوبة) تتذكروا ناس صامولة و فكي منقة وسنعبر ؟تتذكروا الحاجات دي يا جماعة ! مشت وين ؟ ما كان للزبد يوما نفعا بارض السودان الطاهرة
(برأيي) ان رفع حالة الطوارئ سيكون أول المتضررين منه هم (الجماعة إياهم) الساعين للفوضي والفتنة وقد صرحوا بعيد إعلانها بأنها (أي رفع حالة الطوارئ) لا تعنيهم فى شئ !
ليه كده يا ابني ؟
لان القرار (باختصار كده) (كسر) شماعة الفوضي التى يريدونها ان تسود .
و من الآن فصاعداً لن يكن هناك إعتقال بموجب قانون الطوارئ بل سيكن هناك قاضي يقف أمامه المتهم سواءاً أغلق شارعاً او حطم إشارة مرور أو ترس طريقاً تحري وبينه و دفاع و إتهام ثم تغلق القضية بقرار المحكمة وبعدها ..! فإما (رُجّاً) و إما برآءة . وهذا هو ما أفقد اليسار صوابهم منذ الامس الاول فارتفع عويلهم وصراخهم !
و بعد كده أي (زول) يتحمل مسؤليته و (ياهو ده الموجود فى السوق يا مولانا) وقرر براحتك و يا هو داك الشارع وياهو داك القاضي !
(طيب) هل البرهان ومن معه لعبوها صاح ؟ أقول ليك (آآآي وبذكاء كمان) طبعا (حا) تقول لي كيفن ؟ أقول ليك أنا .
شوف يا صاحبي لو لاحظت معاي قبل القرار ده العساكر (دردقوا ليك) فولكر وخلوه هو من (يغرد) انه لا يري لزوماً لإستمرار حالة الطوارئ و يجب ان ترفع (حلو) ؟ بعدها بساعات قليلة طلع خبر يقول ان مجلس الامن والدفاع الوطني سيرفع توصية للبرهان برفع حالة الطوارئ ! بعد سويعات قليلة المجلس يجتمع والبرهان يصدر القرار !أهااا الكلام ده تفهم منه شنو يا عب باسط ؟ أنا غايتو فهمتها !
(طيب) نشوف نتائج الكلام ده شنو؟ (قال ليك) دول الترويكا (ترحب) والآلية الثلاثية (تدعم) و فولكر (الغبيان) مبسوووط باعتباره هو (الضُلُف الكبير) الواقف وراء الكلام ده !والبرهان وجماعتو (لابدين سااااي) لا تصريح ولا يحزنون مش الطوارئ دي ؟ رفعناها ليكم والمعتقلين وفكيناهم تاني فى حاجة ؟
هنالك بعض الناس (والعبد لله منهم) زعلوا اول الامر و قالوا (كيييف) البرهان (ينبرش) لفولكر وكده ! لكن لو قرأنا الحدث بتروٍ ومن زاوية (دواهي السياسة) لفهمنا المغزي . وهنا يمكن القول ان العساكر لعبوها صاح و(خلو) المجتمع الدولي (لافي) .
(برأيي) أن اليسار و المؤتمر السوداني و(مخمومي) الاحزاب الاخري . (الجماعة ديل خلاس (طيارتهم دورت) ! بعد الاعلان عن تشكيل جبهة التيار الاسلامي العريض وظهور زعيم الكيزان الاستاذ على كرتي والارباك الحصل فى الساحة السياسية والدعوة المتنامية لاجراء حوار سوداني سوداني لا يقصي احداً كل هذه المؤشرات تقول (شنو يا عب باسط) ؟
الصعايدة وصلوا صاااح ؟ ده غير كلام (عمنا) ترك بتاع امس !
قبل ما أنسي : ــــ
اليوم (٤٠) مليون (مُقشاشه) ستتجه الى مقر الامم المتحدة بالخرطوم .
فاهمني يا أسطي واللا أعيد الكلام ؟
صبري العيكورة
