كتب بكري راستا عضو تنظيم غاضبون بلا حدود وأحد عقلائه تحليل لخطاب البرهان
⭕ حسب الشيء الفهمتو إنو البرهان بالخطاب دا كتب أخر نقطة في مشاركة الجيش في المشهد السياسي ، قال نحنا كعسكر ما حنشارك في المفاوضات ، نحنا حنقيف بعييييد ، انتو يا مدنيين أمشوا أقعدوا مع بعضكم واتفقوا على حكومة مدنية بتاعت كفاءات وطنية لا حزبية ونحنا بدورنا طوالي حنحل المجلس السيادي ونوافق على حكومتكم وتكون هسي السلطة العليا في البلاد ، ونحنا العسكر علينا بس بالقوات النظامية حنعمل مجلس عسكري مصغر يشرف على القوات النظامية ومسؤول فقط من الأمن والدفاع .
⭕ كدا يا جماعة البرهان ختا الكورة في ملعب المدنيين وطلع برا الملعب وقعد في منصة المشجعين ويشوف الكورة حتطلع كم كم عشان يشجع الفريق الغالب .
⭕ بعد دا البرهان كسر لينا الدش في يدنا ، طيب نحنا زمان بنتظاهر ضد الحكم العسكري وكنا بنقول حكم العسكر ما بيتشكر ، طيب بعد دا حنتظاهر ضد منو وحنعتصم عشان شنو ؟
⭕ افتكر نحنا كقوى ثورة عندنا دور كبير في إننا نخلي البرهان يلتزم بكلامو دا وينفذو ، نحاول نوحد قوى الثورة وندعم الحوار (المدني / المدني) ، ولا ما كدا يا تروس ؟
⭕ أفتكر بعد دا المواكب والإعتصامات والتتريس ما عندها معنى ولا عندها قيمة ، ولو في أي قوى حزبية دعت لإعتصام أو موكب حقو ما نشتغل بيها ونمشي ورا هدفنا وهي حكومة كفاءات وطنية مدنية والجيش بقى للثكنات بالجد ، الجيش بعد دا حيشوف شغلتو وما عندو شغلة بالسياسة ، دي المدنية العاوزنها .
