التحول الديمقراطي ولجنة التمكين خطان متوازيان
صدقوني قصة انو الحشد كبير و لا بسيط دي بالنسبة لي قضية ثانوية يا اخوانا، نوع من المنتشة الفارغة بنكاوي فيها اخوانا ديل، ياااااخي قووول الحشد دة كبير جدا جدا، دي اصلو ما قضيتي انا قضيتي الفكرة من الأساس.
واحد: ما ممكن تقول دي مواكب الحكم المدني و دعم الانتقال الديمقراطي و انت ماشي تدعم لجنة التمكين!! ديل ما بجو مع بعض كلو كلو! زي تقول الحزب الشيوعي الاسلامي ما بتجي يا اخوانا!! لانو بكل بساطة لجنة التمكين دي اكبر مثال لأنك انت ما عندك علاقة بالتحول الديمقراطي و لا الانتقال! انت مشكل لجنة بي قانون غير دستوري ، بتنتهك الدستور جهارا نهارا ، الدستور بمنع مصادرة الأموال و الاراضي و الممتلكات الا بي حكم قضائي انت بتنتهكو! الدستور بقول السودانيين متساوين في الحقوق و الواجبات ومافي تفرقة بناء على الخلفية الفكرية او الراي السياسي انت قاعد تفرق في السودانيين بتهاجم التمكين بتاع الكيزان لكن بطنش التمكين العملوهو الكيزان لي ناس حسي عاملين صحبانك!! الدستور بقول المتهم بريء حتى تثبت ادانتو و انو من حقو الدفاع عن نفسو انت قاعد تدين و تشهر و تحكم و تنفذ الحكم من دون زاتو الزول يقول شي او يدافع عن نفسو!!
بكل بساطة انت ما ممكن بتتكلم عن انتقال ديمقراطي و بتدعم في لجنة التمكين في نفس الوقت، يبقى كونو متظاهرين يكوركو دعما للانتقال دة قدام لجنة التمكين دة معناتا ديل ناس يا كضابين و ديل القحاتة المستفيدين من لجنة التمكين يا ساذج يا طاشي مافاهم!!
اول حاجة لو انت بتتكلم عن الانتقال و التحول الديمقراطي اول شي تنادي بيهو انو اللجنة دي تبقى لجنة قضائية و انو المتهمين بالتمكين ديل يمثلو قدامها و يدافعو عن نفسهم و بعدين يحكمو فيهم و القضاة ديل لازم يكونو قضاة نزيهين مستقلين مش واحد محامي شغال تبع حزب معين تقوم تجيبو تبقي قاضي محكمة عليا!! ناس مستقلة و مشهود ليها بالنزاهة!! هل دي عملية صعبة ! لا ما صعبة ولا حاجة لكن القحاتة دايرين يصفوا خصوموم و يمكنو لي ناسوم!!
اتنين: انتو قلتو دي مواكب دعم الحكم المدني!! ممتاز ديل منو؟ الحكومة مش كدة!!؟ حسي الحكومة دي قالت ليكم انا ما حاكمة!! حسي الحكومة دي قالت ليكم انا مضايقة!!
هل الحكومة دي وجدي؟ الفكي؟ صلاح مناع؟ لا يا سادة الحكومة دي دولة رئيس الوزراء السيد عبد الله حمدوك،
السيد حمدوك قال ليكم المشكلة مافي العسكريين قاليكم المشكلة في عسكريين و مدنيين برضو ما دايرين الانتقال الديمقراطي!! طيب انت جايط في شنو!! اذا هو رئيسك عديل قال ليك المدنيين ديل فيهم ناس متسلبطين!!! و غالبا ديل ناس البعث ناس وجدي و الفرع الجديد بتاعو ناس بيكو!!
نا هو ما ممكن تكون انت عميان عن الحاصل في البلد دة اصلا و تكون متخيل انو الناس مفروض تكون عميانة زيك. Amin Banaga
