الناس البتتقاتل على الكراسى والمناصب… إنتو دايرين تحكموا ياتو بلد؟… وعشان تعملوا لينا شنو مثلا”؟!!
خلينا الجوع والتردى والبهدلة والوساخة والقرف….. ياخ شوفوا وصلنا لى ياتو مرحلة!!!

الأطفال بيتعرضوا للنهب تحت تهديد السلاح وهم ماشين على المدرسة….. والبلد فيها دشليون قوة نظامية وحركة مسلحة!!!

والكاميرات دى غير توجع القلب ما منها فايدة… المجرم عينك ليه ماتقدر تجيبو!! وهو يصول ويجول بكل وقاحة وطمأنينة!!

الشارع السودانى فقد الأمن فى وضح النهار… بقينا عايشين فى هوس ورعب…. وواحد يصرح وواحد يلوح وزول شغال بينا مافى!!

كامل التضامن مع إبننا المسكين العاش أقسى لحظات ممكن يعيشها طول عمره… نسأل الله أن يمنحه القوة والثبات ويحفظه من كل شر ويبرد حشا أهله المقهورين عليه.

وشكراً للزول القلبو حار الأنقذ الموقف وقال لينا لسه فى خير وشوية أمل.

اللهم أنت حسبنا ووكيلنا يا الله.

رجاء

لو فى زول عندو معلومة عن الولد أو أسرته أو ممكن الناس تصلو وتقدم ليه دعم معنوى يقاوم بيه الشرخ النفسى الحصل معاه ياريت يفيدنا.

داليا الياس